ရခိုင်စာပီအတွက် အထူးသတင်းကောင်း

ဒေနိ့ ၅.၁၁.၂၀၁၄၊ ၄ နာရီအချိန်က ဆရာမောင်ဗသိန်းအိမ်မာ အစည်းအဝေးတရပ် ပြုလုပ်ပါရေ။ ရခိုင်စာပီနန့် ဘာသာစကားသုတေသနအသင်း(ဒေနိ့လုပ်တေအစည်းအဝေးမာ ယင်းနာမည်ကို အတည်ပြုခကတ်တေလို့ သိရပါရေ) တည်ထောင်ဖို့နန့် ယင်းအသင်းဧ့ လုပ်ငန်းခွဲအဖြစ် ရခိုင့်အမျိုးသားရည်ညွှန်းစာကြည့်တိုက်(ယာယီ) တည်ထောင်ဖို့ကိစ္စရပ်နန့် ပတ်သက်ပြီးကေ တိုင်ပင်ခကတ်တေလို့ သိရပါရေ။

တက်ရောက်ခရေ ပုဂ္ဂိုလ်တိမာ-
(၁) ဆရာမောင်ဗသိန်း
(၂) ဆရာ လေးဝတီခိုင်ကျော်
(၃) ဆရာမ နှင်းနုခိုင်
(၄) ဆရာဝေဟင်အောင်
(၅) ဆရာ ဖဒူစံရွှေ
(၆) မလှလှဧး
(၇) ဆရာမောင်မောင်စော
(၈) ဆရာဇော်ဝင်းနိုင်
(၉) ဆရာကျော်စိုးလူ
(၁၀) ဆရာမ ပံသုခင်
(၁၁) ဆရာကိုစိမ်
(၁၂) လေးဝတီထွန်းစောခိုင်(သတင်းထောက်)

ပြည်ပရောက်ရခိုင်သားတချို့ရို့ပါးက အသင်းမတည်ဖေသာအဖြစ်ပို့ပီးထားရေ ဖေသာတိရေ တချို့တဝက်လေး ရောက်လားပါယာ။ တချို့လေး လမ်းမာ ဖြစ်ပါရေ။ ယင်းဖေသာတိစုံရေအခါ ဘဏ်မာ အပ်ဖို့ ဖြစ်ပါရေ။ ပြီးစွာနန့် စာအုပ်ဖြည့်တင်းရီးအပိုင်းကို ဆက်လုပ်မေလို့ သိရပါရေ။ ယင်းကဏ္ဍကျီကေ အသင်းဖြစ်တည်ရီးနန့် စာကြည့်တိုက်မြီနီရှာဖွီင်္ခြင်း၊ စာကြည့်တိုက်ဆောက်လုပ်ခြင်းအပိုင်းတိကို ဆက်လုပ်လားဖို့လို့ သိရပါရေ။

စာအုပ်တိကို စုဆောင်းရေအခါ " ရခိုင်အမျိုးသား" ဆိုရေ ဂေါင်းစဉ်နန့်အညီ ရခိုင်အကြောင်းအရာပါရေ စာအုပ်တိကို အဓိကစုဆောင်းဖို့ ဖြစ်ပါရေ။

ပြည်ပလူငယ်တစုကလေး လုပ်ငန်းအဆင်ပြေချောမွိစီဖို့အတွက် လစဉ်ဖေသာကောက်ခံဖို့အတွက်လေး စီစဉ်ထားပြီး ဖြစ်တေလို့ သိရပါရေ။

တက်ရောက်လှာကတ်တေ ဆရာတိအနီဖြင့်လေး အလှူဖေသာတိ ထည့်ဝင်မေလို့ ပြောဆိုမှုတိလေး ဟိရေလို့ သိရပါရေ။

စာအုပ်နန့် လုပ်ငန်းမာ အသုံးဝင်ဖို့ ကိရိယာတိလေး လှူဒါန်းနှိုင်ပါကြောင်း အသိပီးအပ်ပါရေ။

[သတင်း-လှလှဧး]